TINGNAN: Lalaki nagpa-tattoo ng mga ABS-CBN program sa mukha at ulo

ABS-CBN News

Posted at May 08 2020 11:28 AM | Updated as of May 08 2020 12:26 PM

Watch also in iWant or TFC.tv

Kabilang ang isang lalaki mula Legazpi, Albay na nagpa-tattoo ng kaniyang mga paboritong ABS-CBN programs sa mukha at ulo sa mga nalungkot sa hindi pag-ere ng Kapamilya network. 

Ang pinakaunang pina-tattoo ni Caloy Pasahol ay ang logo ng ABS-CBN sa kaniyang kanang pisngi. Sa kalaunan, dinagdagan niya ito ng mga nagugustuhan niyang palabas.

Mula pagkabata niya hanggang ngayong siya ay senior citizen na, fan talaga si Pasahol ng Kapamilya network. Kaya apektado raw sya simula nang hindi na umeere ang Dos.

"Sobrang galit ko Ma'am. Sabi ko wala na. Wala na tayong papanoorin, sabi ng mga anak ko. Ginawa ko sa labas na lang ako tatambay. Wala nang libangan kami, kasi 'yung sinusubaybayan namin mga drama," aniya.

Dagdag pa niya, sinasabihan siya ng mga kapitbahay na tanggalin na ang mga tattoo niya sa ulo dahil wala naman sa ngayon ang ABS-CBN.

"Sabi ko ba't ko tatanggalin eh idol ko yan."

Aniya, kapag nakabalik na sa himpapawid ang Kapamilya channel, magpapa-tattoo siya ulit lalo't may espasyo pa naman daw sa kaniyang ulo.